நான்!

நான் என்பது 

நான் மட்டுமே அல்ல.. 

ஒரு  உடைந்த கண்ணாடியில் காட்டும் 

பல சிதறுண்ட துண்டுகளில் ,

தெரியும் பிம்பங்களைப் போல ,

பல "நான்"களின் தொகுப்புதான்

"நான்! "

உங்களைக்கவர்ந்த நானும்,  

விலகி நடக்க உட்படுத்திய 

நானும் நானே தான்.. 

சிங்கம் போல் கர்ஜித்தவனும் 

நான் தான்..

சிறு பூனைக்குட்டியாய்,

குரல் வெளியேக்கேட்காமல்

 கத்தியவனும் நான் தான்.. ! 

சாரல் மழையில் கைப்பிடித்து,

இசை ரசித்து நடந்தவனும்  

நான் தான்.. 

யாரோவைப் போல்,

ஒதுங்கிச் சென்றவனும் 

நான் தான் .. 

முடங்கிக்கிடப்பவனும் 

நான் தான்.. 

பம்பரமாய்ச்  

சுற்றிச் சுழல்பவனும் 

நான் தான்.. 

எல்லைகளை 

வகுத்துக்கொள்வேன் !

மீறுவதற்கான 

திட்டமும் தீட்டுவேன்! 

நான் மட்டும் போதும் எனக்கு !

சில நேரங்களில்.. 

உலகமே வேண்டுமெனக்கு! 

பல நேரங்களில்.. 

"உலகம் அழகானது" 

என்று மகிழ்ந்திருந்த 

அடுத்த கணத்தில் 

சலிப்புற்றுக்

கடுப்பாவேன்.. 

அதிகார ஒடுக்குமுறை பற்றி குமுறிக்கொள்வேன்.. 

ஆதிக்கம் செய்வதற்கானக் 

காய்களையும் நகர்த்துவேன்! 

என்னை இயக்குபவன்

அந்த "நான்"  களில் ஒருவன் அல்ல ! 

என்னைக் கடந்து செல்கிற 

நீங்களும் தான் ! 😏